Ky informacioni mund t`ju ndihmojë ju të kuptoni më shumë rreth aritmive kardiake dhe se cfarë mund të bëni ju për të zvogëluar rrezikun tuaj për këtë gjendje. 
Ndajeni informacionin me të gjithë njerëzit e tjerë që njihni. 

Aritmia kardiake – cfarë është

Aritmitë janë çrregullime të ritmit të zemrës, duke përfaqësuar disa nga sëmundjet më të zakonshme të hasuar në mjekësinë kardiovaskulare.

Sa e shpeshtë është aritmia kardiake?

Pothuajse cdo njeri ka përjetuar ose do të përjetoje ndonjë lloj aritmie në një moment të caktuar të jetës së tij. 
Fatmirësisht, pjesa më e madhe e këtyre ngjarjeve janë të parrezikshme, kurse disa lloje aritmish (në varësi të shkaqeve të tyre) mund të kërcënojnë seriozisht jetën dhe përbëjnë urgjencë mjekësore

Simptomat dhe shenjat e aritmive kardiake

Aritmitë mund të mos shkaktojnë asnjë shenjë dhe simptoma. Në fakt, mjeku mund të zbulojë shenja të një aritmie të kaluar tek ju, gjatë një ekzaminimi rutinë. Madje edhe shënjat apo simptomat e dukshme nuk nënkuptojnë domosdoshmërisht që vuani nga ndonjë problem serioz.

Simptomat e dukshme të aritmive mund të përfshijnë: 

• Ndjenja e rrahjeve të crregullta të zemrës në kraharor
• Rrahje e shpejtë e zemrës (takikardi)
• Rrahje e ngadaltë e zemrës (bradikardi)
• Dhimbje gjoksi
• Vështirësi në frymëmarrje
• Marrje mendsh
• Djersitje
• Të fikët (sinkop) ose ndjenja e të fiktit

Shkaqet e aritmive kardiake

Sistemi përcues elektrik i zemrës është shumë i specializuar dhe impulset elektrike prodhohen nga qelizat stimuluese të ritmit të zemrës (Figura në vijim). Kur sistemi funksionon siç duhet, çdo rrahje zemre gjenerohet në një model të rregullt dhe kjo njihet si ritmi i sinusit

Figura. Përcimi normal i sinjalit elektrik në zemër

Aritmitë lindin si rezultat i problemeve në sistemin e përcimit të zemrës dhe mund të shkaktohen nga shumë shkaqe: 

• Një atak kardiak i momentit
• Indi fibroz i zemrës i lënë nga atake kardiake të mëparshme
• Ndryshime të strukturës së zemrës, si psh. nga kardiomiopatia
• Bllokimi i arterieve të zemrës (sëmundja e arterieve koronare)
• Presioni i lartë i gjakut
• Gjendra tiroide shumë aktive (hipertiroidizmi)
• Gjendja tiroide dembele (hipotiroidizmi)
• Duhanpirja
• Abuzimi me drogat, alkoolin ose kafenë
• Stresi
• Disa medikamente dhe suplemente
• Diabeti
• Apnea e gjumit
• Gjenetika

Llojet e aritmive kardiake

Aritmitë kardiake klasifikohen në dy grupe të mëdha:

•  Takikardia – që i referohet shpejtimit të ritmit të zemrës mbi vlerat normale, psh. një ritëm mbi 100 rrahjë/minutë kur jemi në qetësi
•  Bradikardia - që i referohet ngadalësimit të ritmit të zemrës nën vlerat normale, psh. një ritëm nën 60 rrahjë/minutë kur jemi në qetësi

Ka shumë lloje takikardish dhe bradikardish, të cilat kanë shkaktarë të ndryshëm
Jo të gjitha takikarditë dhe bradikarditë nënkuptojnë probleme shëndetësore. Për shembull, është normale që ritmi i zemrës të rritet gjatë aktiviteti fizik, kurse gjatë gjumit ritmi i zemrës mund të ngadalësohet

Faktorët e rrezikut të aritmive kardiake

• Sëmundja e arterieve koronare, probleme të tjera të zemrës dhe operacionet e mëparshme të zemrës, janë faktorë rreziku për cdo lloj aritmie
• Presioni i lartë i gjakut
• Sëmundja kongenitale (e lindur) e zemrës
• Problemet e gjendrës tiroide
• Disa medikamente dhe suplemente
• Diabeti
• Apnea obstruktive e gjumit
• Imbalana elektrolike në gjak
• Konsumi i tepërt i alkoolit
• Përdorimi i tepërt i kafesë ose nikotinës (duhanit)

Komplikacionet e aritmive kardiake

Disa aritmi mund të rrisin rrezikun e goditjes cerebrale dhe deshtimit te zemrës, të cilat mund të kenë pasoja serioze për shëndetin dhe jetën.

Ekzaminimet për aritmitë kardiake

• Një EKG me 12 elektroda duhet të kryhet në të gjithë pacientët që dyshohen për aritmi. Ekzaminime të tjera përfshijnë:
• Testet e gjakut: gjak komplet (anemia mund të shkaktoje takikardi sinusale); urea dhe elektrolitet (hiperkalemia dhe hiperkalcemia mund të predispozojnë për aritmi); testi i funksionit të gjendrës tiroide (hipertiroidizmi është shkak i rëndësishëm i fibrilacionit atrial dhe taki-aritmive të tjera)
• Holter 24-orësh ambulator (i dobishëm tek pacientët me aritmi të shpeshta por kalimtare)
• Ekokardiografia (kur ka fakte të sëmundjes ishemike ose strukturale kardiake)
• Studime elektrofiziologjike tek pacientët me episode paroksizmale të përshtatshëm për terapinë me ablacion, dhe tek pacientët në rrezik të lartë me simptoma paaftësuese dhe fakte të sëmundjes ishemike të zemrës. 

Parandalimi i aritmisë kardiake

Për të parandaluar aritmitë, është e rëndësishme të ndiqet një stil i shëndetshëm jetese që redukton rrezikun e sëmundjeve të zemrës.

Trajtimi i aritmive kardiake në përgjithësi

Menaxhimi i pacientëve me aritmi mund të jetë mjaft kompleks.

• Trajtimi farmakologjik, sidomos medikamentet anti-aritmike, dikur ishin trajtimi kryesor për aritmitë, por përdorimi i tyre ka rënë që prej përdorimit të procedurave elektrofiziologjike ndërhyrëse. Megjithatë, barnat anti-aritmike përdoren ende në praktikën klinike, kryesisht si një ndihmës ndaj terapive të tjera. 
• Pajisjet e elektrofiziologjisë ndërhyrëse përfshijnë shpërndarjen e impulseve elektrike me voltazh të ulët për të stimuluar depolarizimin e miociteve kardiake, vecanërisht në rastin e bradikardive (pacing) ose impulse me voltazh të lartë për të depolarizuar në mënyrë globale dhe të përkohshme zemrën, rivendosjen e ritmit të saj, vecanërisht gjatë takiaritmive jetë-kërcënuese (kardioversioni ose defibrilacioni).
• Defibrilacioni i zemrës përdoret kryesisht për trajtimin e aritmive ventrikulare, fibrilacionin atrial ose takikardinë atriale (flutter). Kardioversioni mund të jetë elektrik i jashtëm – njihet me termin kardioversion DC, ose kimik i brendshëm ku përdoren medikamente anti-aritmike (psh., amiodaroni, prokainamidi) dhe indikohen në pacientë me fibrilacion atrial dhe takikardi atriale. 

Mjekësia alternative

Disa lloje terapish alternative mund të jenë të dobishme për reduktimin e stresit, si psh:

• Yoga
• Meditimi
• Teknikat e relaksimit
• Akupunktura
• Acidet yndyrore omega-3

Akupunktura mund të jetë e dobishme për të reduktuar disa ritme të crregullta të zemrës por duhen më shumë kërkime në këtë fushë.

Pyesni mjekun tuaj për ekzaminimet për aritmitë kardiake që ofrohen në qytetin ku ju banoni.

Konsultohuni me mjekun e qëndrës suaj shëndetësore për cdo informacion që ju kërkoni të dini.

Konsultohuni online me mjekun

Shih materialin Video (intervista me mjekun; intervista me personel mjekësor, testimonials, vox pop)